إحنا فعلاً شعب فاشل .. !

https://www.facebook.com/notes/hala-moneer-bedeer/%D8%A5%D8%AD%D9%86%D8%A7-%D9%81%D8%B9%D9%84%D8%A7%D9%8B-%D8%B4%D8%B9%D8%A8-%D9%81%D8%A7%D8%B4%D9%84-/10151300418946696

http://almogaz.com/news/opinion/2012/11/18/583947
وقبل ما حد يِحَسِّس عَ البطحة اللي على دماغه ويهاجمني وقال إيه : " باشتم الشعب " أيوة يا فاشل ، كلنا فشلة .. إحنا شعب فاشل وشعب مالوش ديَّة ، وشعب أهبل يضَّحك عليه بماتش كورة بالليل وعنده جنازة من الصبح !! ..

قطار أسيوط ساب القضبان وطلع على أتوبيس العيال يا كفرة !!

الأتوبيس ورقة سجاير تحت العجل !!

يبقى العيال البريئة ؛ حتة اللحمة الحمرا بقوا عاملين إزاي ؟!! ..

أقولك عاملين إزاي ؟ الناس عِرفتهم من الجزم ، يعني الرِّجْل اللي مقطوعة هناك دي ابن فلان ، بس الجزمة دي ما اعرفهاش ؟! حد يا جماعة يعرف دي جزمة مين ؟؟ .. عيل طوله ما عدَّاش متر بِيِتْعرف بوحمة ولَّا بِشَامة ؟! طيب اللي اتفرموا فرم ، هيتعرفوا منين ؟؟!! .. من اللبس ؟! خلاص المدارس تِلْغِي توحيد الزي المدرسي ، علشان يكون علامة لكل أم وأب يعرفوا بها ولادهم لما يروحوا فطيس بالمنظر ده ، واللي ما عندوش شامة ووحمة ؛ يعمل لابنه وبنته شامة صناعي ، يِحمي حديدة سخنة ويِعْمِلُّوا علامة في فخذه ولا ظهره للاحتياط !! ..

 فعلاً صدق عمرو أديب ، ولأول مرة أحسه صادق ؛ إحنا شعب فاشل ! لأنه ضغط على الجرح ، الجرح هو وضعنا المقلوب فوقه تحته ، دا منظر شعب عمل ثورة وأسقط نظام ؟! من أول يوم في الثورة وتلاقي ناس عديمة الإحساس ، مسحوبة الدم بتتفرج على المسلسلات وبرامج الأغاني وتخريج الفنانين !! في عز الناس ما كانت بتِدَّهس في الشوارع ودول بِيْلِمُّوا بعض علشان يطلعوا على قهوة يشوفوا ماتش !! في عز المصايب اللي البلد بتصحى وبتنام عليها كل يوم تلاقي ناس بتجادل وبتشتم في الثورة وفي اللي عمل الثورة وهي أقصى علمها بأحداث اليوم بيكون سماعي من اتنين بيكلموا بعض في الميكروباص!! ..

مذيعة على ال ON TV  بتقول : ( 55 مستقبل تم القضاء عليهم اليوم !! ) نعم 55 مستقبل ، مش يمكن ارتاحوا من مستقبلهم الأسود ؟! المستقبل اللي مش باين له ملامح ، إذا كان إحنا ما بطلناش نقول مصر رايحة على فين ؟! أب يحكي على كيفية معرفته لجثة ابنته ، لا عرفها بجزمة ولا بلبس ولا بوحمة ، عرفها بكراسة الانجليزي اللي كانت في إيدها ، أصل بنته كان نفسها تدخل كلية الطب ، ما تزعلش يا حاج ، أواسيك من واقع أسود عايشينه كلنا : ما يمكن كان اتقدم لها عريس وجَوِّزتَها علشان جواز البنت سُترة ، وأهو الدستور مش هيحدد سن الجواز ، والعريس حلو وابن ناس وجاهز ومصير البنت لبيتها وجوزها ، وبلا هدة قلب ( وإنت كنت عارف إنها تموت وتدخل كلية الطب ) ، وبعدين رجعتلك بعيِّلين على كتافها تِتْحسر وتندم ع اليوم اللي جوزتها فيه ، ولا أقولك بلاش ؛ خليها دخلت كلية الطب ودَفَعْت عليها دم قلبك وبعدين اتخرجت ،هتعمل إضراب لتحسين منظومة الصحة ، ولا هتطلع مظاهرة مع أصحابها وتروح فيها بلاش مثل سالي زهران ( ولا نِسِيتها ) ، ولَّا إبن أخوك كان هيطلع يِهِج م البلد ، يتمرمط في بلاد الله ، ولا بقعد في البلد عينه تطلع وتجيله كل الأمراض ومايلاقيش حق العلاج ، ولا يركب مركب يغرق في البحر ، ولا يركب قطر وهو كبير في الفيوم ويعمل حادثة ويموت برضه زي اللي ماتوا الأسبوع اللي فات ، ربنا رحمهم بدري " إنا لله وإنا إليه راجعون " أقولك : انتظر القصاص .. - قصاص ؟! أيوة من عند ربنا يعني " المنتقم الجبار ، الذي لا يغفل ولا ينام " طبعاً مفيش قصاص على الأرض لأن الآلاف يَامَا ماتوا ، وياما بيموتوا، وياما هيموتوا ، وعلشان إحنا بننسى حبتين وبنقعد نصرخ ونْوَلْوِل لغاية لما مصيبة تانية تحصل ، وأهو مصيبة في ديل كارثة في قفا مأساة ، أدينا شعب طيب بننسى وسبحان من له الدوام ..

بقى لنا قد إيه وإحنا بنادي بتوعية الشعب للي بيحصل حواليه ؟! بقى لنا قد إيه " نؤذن في مالطا ، ولا حياة لمن تنادي " ؟! .. ويتهمونا بالكفر والعلمانية والخروج عن الدين !! إحنا برضه اللي كفرة يا كفرة !! أطفال تعويضها الراس ب أربعة آلاف ولا خمسة آلاف جنيه ؟؟!! والله يا بلاش ، إنتوا عاملين حسابكم ومنزلين التسعيرة كده ليه ؟ عارفين إن دي مش آخر مرة ، علشان كده خليكوا في الحُنين أحسن لسه اللي جاي كتير !! وفي عز القهر ده تلاقيهم لسه بيتخانقوا على الدستور !!  واللي عايز مادة تجوِّز البنات صغيرين ، ومش عارفة دا عايز مادة تعمل إيه ؟! ولسه المشاريع بقوانين اللي هتطلع من قلب برلمان قندهار الجديد هيبقى لها العجب ! والكتاتني رئيس الحرية والعدالة اللي بيستنكر حادث القطار وتطالب بالضرب بيد من حديد على كل مسئول ، نعم !! بتطالبوا مين ؟! هو مش إنتوا اللي ماسكينها برضه ؟! هو إنتم وظيفتكوا إيه بالضبط ؟! جولات ميدانية تتصوروا وترجعوا ، وتوافقوا على طلبات الناس اللي بقى لها زمن بعد لما تقع الكارثة ، كما صرح المتحدث باسم مجلس الوزراء إن هشام قنديل وافق على ربط المدينة بداية من كوبري مدخل المدينة حتى وسط المحافظة وتوفير قطعة أرض لبناء معهد أزهري وتزويد المستشفى الجامعي بأسيوط بكافة المستلزمات الطبية وتعيين أهل المحافظة في الوظائف الخالية ، وكأن الناس لازم تدفع ضريبة من الدم ، إييييه ؟ اتقوا الله بقى ! لما في إمكانية لده كله ما بيتعملش ليه من البداية ؟ ولا هي مسكنات وتصريحات وموت يا حمار لمَّا حاجة تحصل كالعادة !! خليكوا شاغلينا وشاغلين نفسكم بتعيين وزير وقسم وزير وإقالة وزير ، وأنا مش عارفة على أي أساس يتم اختيارهم ، وأهو رايح فين ؟ رايح الوزارة ، جاي منين : جاي م الوزارة !! .. عِرفنا إنه إرث مبارك الفاسد ، طيب إنتوا بتعملوا إيه ؟! ال 100 يوم خلصوا من زمان ، فين ال 100 يوم التانية ؟! نعد ولَّا ما نِعِدِّش ؟!! ..

وعلشان إحنا شعب حلو وجميل ، خلوا بالكم دي وسيلة تحديد النسل الجديدة ، مالقوش الأمراض بتعمل معانا نتيجة ولا الجوع والفقر بِيْهِدِّنا ، ولا بيجي لنا إعصار ساندي ولا تسونامي ولا زلازل من بتوع تركيا ، قالوا يخلصوا علينا بالقطاعي كده ..

حسبي الله ونعم الوكيل في كل إنسان تسبب في لحظة قهر وألم في قلب أم أو أب على فلذة كبدهم ، أدعو بالصبر والسلوان على قلوب الآباء والأمهات ، ورحم الله عصافير الجنة ، نعم أنتم سبب لدخول آبائكم الجنة بإذن الله ..