الشعب يريد إسقاط الإخوان ..

http://almogaz.com/opinion/news/2012/10/13/428145
https://www.facebook.com/AlmogazNews/posts/519208161441897
https://www.facebook.com/notes/hala-moneer-bedeer/%D8%A7%D9%84%D8%B4%D8%B9%D8%A8-%D9%8A%D8%B1%D9%8A%D8%AF-%D8%A5%D8%B3%D9%82%D8%A7%D8%B7-%D8%A7%D9%84%D8%A5%D8%AE%D9%88%D8%A7%D9%86/10151255246631696

من غير مقدمات طويلة وكلام متذوَّق أحب أفكَّر كل فرد من الإخوان المسلمين بأفراد الشعب اللي انتخبوا مرسي وعصروا على نفسهم فدان ليمون بحاله  علشان ما حدش يقول إن الثورة اللي قامت في بلد ضد النظام حَكَمْها في الآخر واحد من النظام نفسه ، وإن الأسطورة الخايبة اللي اخترعناها لنفسنا علشان نصبَّر بعض وإحنا بنعطي صوتنا للإخوان إننا نقدر نتظاهر ضدهم في أي وقت  لكن ضد شفيق لأ أثبتت فشلها وبالثُلُث ومن بدري مش يوم " جمعة الحساب " فقط ، لأ من يوم ما اجتمعت القوى للتظاهر أمام مجلس الشعب يوم جلسته الافتتاحية لإنهاء حكم العسكر ونقل السلطة للبرلمان فوقف شباب الإخوان بأجسادهم متاريس مثل الأمن المركزي في وجه مسيرات القوى اللي قامت الثورة على كتافها وعلى جثث شبابها .. 

-         صحيح إن ميدان التحرير مركز للتعبير وإبداء الرأي والتظاهر وليس حكراً على أحد ، ولكن حين تختلف الآراء فصاحب الرأي المخالف ينتقي له ميدان تاني يعبَّر فيه عن رأيه لأن ميدان التحرير رمز للثورة وليس رمز لتأييد الرئيس ، ولو الإخوان نسوا إنه الميدان اللي كانت تتعالى فيه أصوات الشعب يريد إسقاط النظام فلابد أن يجدوا لأنفسهم أحداً يذكرهم بذلك قبل أن يسمعوا مقولة الشعب يريد إسقاط الإخوان ، دا عكاشة اللي بنقول عليه أهبل ما عملهاش وجه ميدان التحرير يتظاهر ضدنا ، كان بيتظاهر في ميدان العباسية ، يبقى لما القوى السياسية تعلن من أسابيع ويمكن شهور عن جمعة كشف الحساب بعد مرور ال 100 يوم العجاف وإبداء اعتراضهم على الجمعية التأسيسية تقوموا تجيبوا بعضكم وتتظاهروا ضدنا في الميدان ؟ دي ما خرجتش من عكاشة !!

-         كان زمان بيقولك إيه : ( كِذب مِساوي ولا صِدق مِنَعْكِش ) تقوموا لما تيجوا تكدبوا وتنكروا وجودكم في الميدان ، كل واحد من قادتكم يطلع لنا بتصريح ، اللي يقولك الإخوان ما راحوش الميدان !! ( يا نصابين !! / إيموشن خالد عبد الله ) أُمَّال الأتوبيسات بتاعتكم دي كانت بتعمل إيه في عبد المنعم رياض ؟! ولا أنتوا بتأجروها بالساعة لجروب طالع رحلة ولا يمكن البلطجية والطرف التالت سرقها منكم زي المدرعات اللي كانت اتسرقت من المجلس العسكري ودهست المتظاهرين المسيحيين في ماسبيرو !! وواحد تاني يناشد الإخوان المتواجدين في الميدان بالانسحاب للتظاهر أمام دار القضاء العالي ، وواحد تالت يقولك تواجدنا الساعة الخامسة ومشينا الساعة 6  ولنا 100 مصاب ، دا لو كان الجمال والبغال بتجري في الميدان كان هيبقى العدد أقل من كده ، دا كل اللي اتصاب بالأمس 121 تقريباً ، يبقى فِتواتكم اللي كانوا بيضربوا في معارضينهم 100 مصابين ، والباقي 21 فقط ؟!  واضح إن الإخوان ( ما بيعرفوش يكدبوا ) ..

-         موقعة الجمل لما تيجي على أذهان كثير من الناس بيفتكروا فقط مشاهد الجمال والبغال والخيول وهما بيجروا في نص الميدان ولكن المشهد الأكثر إيلاماً هو مشهد قذف الحجارة بين الطرف المؤيد لمبارك والمعارض له لمدة تجاوزت اثني عشر ساعة ، فما حصل في "جمعة الحساب" من تكرار نفس المشهد يوقع في القلب كثير من اليأس عن مستقبل مصر ، كان ناقص بس شوية دبابات للجيش علشان قطعان الآدميين اللي كانت من غير جمال ولا بغال تمر من بين أيديهم مرور الكرام دون سؤال عن سبب اختلاطها بمن في الميدان ، وكان ناقص كمان شوية قناصة فوق العمارات علشان بعد كده نسأل هما طلعوا المباني ازاي وتبع جهات أجنبية ولا طرف تالت !! الطرف الثالث اللي ياما غنينا عليه من خيبتنا في التوصل للجاني الحقيقي ، أقولكم يمكن يكون فتحي سرور مش خرج براءة إمبارح أكيد وصّى على موقعة جمل تانية احتفالاً بخروجه بالسلامة ، ما هو أي كلام وخلاص !! ..

-         كنا نعاني أيام مبارك من بطء اتخاذ القرارات أو ابداء التصريحات في أي شأن خصوصاً المصايب اللي كانت بتيجي على البلد ، الوقت بقينا بنعاني من الغباء في القرارات مثل قرار بعودة مجلس الشعب ثم الرجوع عنه ، قرار بإقالة النائب العام ثم الرجوع فيه ، تصريح بإعادة تشكيل الجمعية التأسيسية ثم الرجوع عن ذلك ، تصريح بأنه يجب التظاهر بتصريح ثم الدعوة للتظاهر دون تصريح بحجة الاعتراض على براءة متهمي موقعة الجمل ..

-         مش عارفة مصر عملت ذنب إيه علشان حكامها يبقوا بالطريقة دي ؟! خلاص اللي هيغني على مصر بالفتن مش هتبقى بين المسلمين والمسيحيين فقط ؟ خلاص أصبحت الفتنة بين المسلمين أنفسهم ؟ مشاهد الهتاف والتكبير والناس بتضرب بعض خلاص بقت فتوح إسلامية مسلمين ضد مشركين ؟؟ مشاهد ضرب الإخوان لمعارضينهم مثل مشاهد جنود المجلس العسكري والشرطة العسكرية للمتظاهرين وسحلهم وتعريتهم ؟؟ دا كلنا كنا واقفين جانب متظاهرين حازم أبو إسماعيل أيام الترشح للانتخابات وأقرينا بحقهم في التظاهر والاعتصام وهم إسلاميين أيضاً ، يبقى ليه كل التكفير ده ضد الأحزاب الليبرالية ؟!! مش يبقى علشان خاطر الكراسي مش علشان خاطر تطبيق الشريعة كما يدَّعي تجار الدين ؟!

-         ولكن اللي أعرفه إن ما نحن فيه من خيبة هو إن مفيش واحد من اللي بنقول عليهم ثوريين هَمّه على البلد بجد ، لأنهم كانوا عملوا المستحيل وجمعوا نفسهم في كيان واحد يقدر يقف في وجه الإخوان اللي متفوقين علينا بسبب تنظيمهم اللي بقى له عشرات السنين ، فيبقى من الغباء إن أحد يصدق إن أي حزب جديد أو تيار هيقف أمامهم ويقدر يتفوق عليهم لسبب واحد بس إن كلمة السر عند الشعب والكلمة دي ( الإسلام هي الحل ) وإنك لو مديتش صوتك لي هتدخل النار مع المنافقين والكفار ، وما شاء الله على شعبنا أهم حاجة يدخل الجنة وهو قاعد ع القهوة بيتفرج على ماتش أو أغنية لهيفاء وهبي ، فأهو ينتخب الإخوان ويلحق له أي حاجة تدخله الجنة من غير تعب ، لكن مثل ما حصل في حزب النور من انشقاقات لأنهم تركوا مهمتهم الدعوية وشغلوا نفسهم بكراسي وسياسة مالهمش فيها ، أنتظر معجزة في صفوف الإخوان أيضاً تكشف كذبهم ومراوغتهم التي طالما أغمضنا عنها كي تسير المراكب ..

-         واعملوا حسابكم أنه لو بقينا بنفس الأسلوب بتصنيفاتنا إخوان متسلطون ، جماعات جهادية تكفيرية ، سلفيون أدعياء دين ، حركات وأحزاب ثورية تعمل بانعزال عن بعضها ، وشعب مع الرايجة وكلمة توديه وكلمة تجيبه ، فاعلموا أن مرسي هو الرئيس القادم بعد أربع سنوات أو ربما يكون العريان أو الكتاتني أو خيرت الشاطر ، أو أحداً من الجماعة الإسلامية أو من السلفيين ، ما إحنا قرَّبنا على إقامة الخلافة الإسلامية ..

-         مش عارفة أقول الثورة مستمرة بأمارة إيه ؟ كل لما أحس أنها فُرِجت ألاقي مليون حاجة تحصل تعقدها أكتر من الأول ، لكن اللي أقدر أقوله : إن فيه دم لا يمكن يروح هدر مهما طال الزمن ..

-         في اللحظة دي تمنيت إن شفيق الرئيس ! على الأقل ماكناش شفنا المأساة اللي حصلت ، كنا هنفضل إيد واحدة فعلاً بالرغم من قلب كل واحد في إيه للتاني ولكن أرجع أقول إن ما حصل هو الأحسن حتى يبدأ الشعب يفكر جدياً الصالح مع مين ويعطي صوته المرة الجاية لمين ..

-         يسقط ، يسقط حكم الإخوان ..