http://www.almogaz.com/opinion/news/2012/03/8/213634
شعب مصر العظيم :
شعب مصر العظيم :
هازَّعق زي الغول ..واجَعَّر واقول :
تعاليلي يا بطة .. وشيليلي الشنطة .. في زيارة أونطة .. وانا مالي هه..
قالها مجنون لإسماعيل يس عندما كان في مستشفى المجانين لذا أحب أن أهديها لكم تلك " القفشة " المضحكة بمناسبة الهم اللي يضحك
والهم اللي يبكي بالذات بعد أمر المحكمة اليوم بإلقاء القبض على المتهمين
الأمريكان الهاربين في قضية التمويلات !! .. وانا مالي هه .. زعَّق المواطنون الشرفاء من
قبل وجّعَّروا على منظمات العمل المدني العميلة والجاسوسة " يا مامي " والتي
تسعى لتقسيم مصر وحظرهم من السفر ، وفجأة وفي غمضة عين وجدناهم بيهربوا وبيركبوا طيارة عسكرية لابسة " طاقية الإخفاء "
نزلت المطار من غير ما ناخد بالنا وطارت تاني .. وبعد كده نفتح التليفزيون نلاقي
المستشار عبد المعز بيقولك القضاء لم يتدخل ، تفتح الراديو تسمع المجلس العسكري
بيقولك سنحاسب المسئولين عن سفر المتهمين ، تفتح النت تلاقي الجنزوري بيقولك ماليش
دعوة ولن نركع ، تبص من الشباك تلاقي فايزة أبو النجا بتقولك عرفت من الجرايد زي
أي مواطن عادي ، تقف في البلكونة تلاقي الكتاتني بيكذب الأمريكان لما شكروهم
لوساطتهم في الموضوع والأدهى إننا نعرف إن إسرائيل تدخلت هي كمان ، كل ده واحنا
قاعدين نتفرج ويِعلَى الضغط ويِعْلَى السكر، يجي بقى شق " تعاليلي يا بطة وشيليلي
الشنطة " والزيارة الأونطة لمجلس الشورى وعدد من الوزراء المحترمين ضمنهم
الوزيرة فايزة شايلين الشنط الوزارية بتاعتهم وقالوا وعادوا وكل واحد يقولك : وانا
مالي هه !! أنا عندي اقتراح ما يجي مجلس الشعب يعمل لجنة يشوف مين المتورطين في
مذبحة سفر الأمريكان من غير محاكمة أكيد هنعرف مين الجاني زي ما عرفناه في مذبحة
بورسعيد والداخلية !! ..
وكلاكيت تاني مرة مواطن شريف تاني وهو محامي يجَعَّر ويقول ويطلب
بإدخال تهم جديدة وهي الخيانة العظمى والتجسس على مصر وينادي بتغليظ العقوبة حد
الإعدام !! سؤال برئ : هو حضرتك ما عملتش " الباللو " ده ليه على القضاء
علشان تعرف المسئول الحقيقي عن سفر الأمريكان
اللي لغاية الوقت ما نعرفوش واللي حاشا لله بدأنا نشك إنه يكون اللهو الخفي
تاني !! أنا مش عارفة والله هو احنا برضه مش دولة مؤسسات والمفروض إن لما تطير
طيارة على رأي وزير الطيران المدني اللي قال إنهم لازم يكونوا واخدين التأشيرات
على الباسبورات بتاعتهم وأن طيارتهم لم تقلع إلا بمعرفة المجلس العسكري !! يبقى
مين اللي بيلعب " أستغماية " مع القضاء ؟! هو المطلوب إيه من الشعب ؟!
المفروض إن فيه ناس كتير مصدقة إن المنظمات دي عميلة ومخربة وخلاص الناس دي ظبطت دماغها
على كده وماشية مغمضة عينيها وراء أي حد يقولها تعالوا لما أوديكم لبابا المجلس
العسكري ، بابا المجلس مستنيكم هناك أهه .. والناس ماشية ومسلمة أمرها لله ، وفجأة
يلاقوا بابا المجلس بيهرب الأمريكان في القضية من غير ما يقولهم : إن أصحابنا حلوين
زي ما هُمَّا وخلاص سماح النوبة دي ومش قصدهم ، ولا قال : لأ دول يا ولاد العو
الوحش اللي عايز يخطفكم زي ما قلتلكم قبل كده .. طيب المفروض منطقياً لو الناس أخدت
بالها إن فيه حاجة غلط في الموضوع يبقى المفروض إن الطاعة العمياء دي تكون اتهزت
شوية بمشهد الأمريكان وهما طايرين على بلدهم كده من غير حساب ولا عقاب بعد التطبيل
للتقسيم والتخطيط والتنقيط ويبقى ( رُبَّ ضارةٍ نافعة ) .. لكن لما يطلبوا القبض
عليهم تاني النهاردة يبقى المقصود إيه ؟! يبقى المقصود إنك مش تخلي الناس تِفَكَّر
، دا انت عايز الناس تِكْفَر ، إنت عايز الناس تتجنن وتتشل من التفكير وتكره نفسها
وتسلم إن البلد دي مالهاش صلاح .. يعني نعيش زي ما كنا عايشين الأول مِسَلِّمين
أمرنا لله وزي ما تيجي تيجي ودا حال الدنيا ومفيش فايدة وخلينا جنب الحيط وإحنا
مالنا وأنا يعني اللي هاغَيَّر لوحدي .. طيب نستنى أخبار جديدة إيه دلوقت ؟! النيابة تبعت أمر الضبط والإحضار لأمريكا على يد
مُحْضَر مثلاً ، ولا هاتبعت اتنين مخبرين يترصدوا لهم في الطريق ويجيبوهم من قفاهم
، ولا لسه المياه في مجاريها بيننا وبين هيلاري كلينتون اللي نَزِّلت كلام المشير
المرة دي واللي ما بينزلش الأرض أبداً
وهاتجيبهم طوعاً أو كرهاً زاحفين على بطونهم لمصر لينالوا القصاص العادل فيها !!
كنتوا كَفِيتوا على الخبر ماجور وسكتوا بقى بعد الفضيحة دي بعد ما
اتهزت صورة قضاءنا المصري أمام العالم كله .. لأ دا أنتم قَلِّبْتُوا المواجع من
تاني بعد لمَّا كانوا في إيدينا ومشيتوهم ، جايين تعملوا عنتر الوقت ولَّا هِيَّ
ساعة تروح وساعة تيجي لما تخلوا الناس تجيلها ( " شَعْرَة "ساعة تروح وساعة تيجي )، ولَّا علشان مش موجودين يبقى نِزَعَّق ونْجَعَّر براحتنا ..
ليست هناك تعليقات:
إرسال تعليق