ثورة تَنَكُرِيَّة !

http://www.almogaz.com/politics/news/2012/01/15/152413
http://www.facebook.com/AlmogazNews/posts/314728261904881?cmntid=314790058565368&notif_t=comment_mention

( بركاتك يا " صفوت الشريف " هُوَّ مش مسجون لكن والحق لا يمكن ننسى أبداً مقولته الشهيرة " مصر مش زي تونس ) ..

ها هي تونس تحتفل بمرور سنة على ثورتها ولكن على الطريقة الصحيحة وليس على طريقتنا الخاصة من الجدال والفلسفة ( ونِحْتِفل ولَّا ما نِحتفلش ، وهانعمل إيه في عيد الشرطة اللي مولود معاها في نفس اليوم من أيام الإنجليز فا مِش هايهون علينا نغير عيد ميلاده علشان حيَّاالله الثورة ) ..

احتفال تونس تُرفع فيه لافتات ( شغل حرية كرامة وطنية ) ، (أوفياء لدماء الشهداء ) ، (ثورة الأحرار من أجل استكمال الثورة ) وهم الذين حققوا الغاية الأكبر ألا وهي تسليم السلطة لرئيس مدني منتخب ، المرزوقي الذي يقر أن : ( جرحى وشهداء الثورة لم ينالوا الاعتراف اللائق بهم ) ، أما نحن فيدعونا المجلس العسكري لإحياء ذكرى الثورة بالغناء والرقص ( وهو عارف إن الشعب يموت في شوية هِيصة وغُنا وتصفيق ) يدعونا للاحتفال باستمرار حكم العسكر واستمرار الاستبداد واستكمال نظام مبارك الساذج حتى في الاحتفال بالغناء وليس باستعادة روح العناء التي شهدته مصر لتقوم تلك الثورة أو إحياء ذكرى الشهداء .. ومن الذي سيحتفل أَهُم الثوار الذين لم يفقدوا روح الثورة طيلة العام الفائت أم أخوتنا الذين نعتوا الثورة بالحركة والثوار بالبلطجية  والحركات السياسية بالعميلة والمأجورة ولا يعلمون شيئاً عن الثورة سوى أنها كانت في 25 يناير .. وهذا كان الشق التراجيدي ..

أما الشق الكوميدي .. فبعد الشفرات الكلامية التي ( قَفَشتها ) صفحة المجلس العسكري والتي تُحَرِّض ضده ، أقترح أن يكون احتفالنا بالثورة على غرار الحفلات التنكرية ( زي أفلام زمان كده ) كل واحد يحضر الاحتفال بِزِيّ الشخصية التي يفضلها ولأن في جو الثورة هذا لا أحد يُطيق أحد فأكيد (هاتِلبس ) ملابس الشخصية التي تكرهها طول الوقت ومِحَمِّلْها مسئولية اللي بيحصل ومِشَيِّلها الأجندات والجُوانْتيات والصوابع الخارجية .. وعلشان ما يهونش علينا نِحتفل من غير مفجر الثورة الزعيم المخلوع  مبارك فلازم يِشَرَّفنا مُرتدي زي بن علي وهو هربان من تونس وياريت لو يربط على راسه (باندانة علم تونس ) وممكن يجيب معاه أولاده لابسين دراكولا مصاص الدماء وحبيب العادلي في زي جيمس بوند والسادة سرور والشريف وزكريا عزمي لابسين جمال وحمير .. والدعوة أكيد ستُوَجَّه لشفيق بس يجي لابس بومبونة كبيرة والسادة عصام شرف واللواء العيسوي ويجيبوا الطراطير بتاعتهم وهم جايين ومش عارفة الجنزوري عنده واحد ولَّا يحب نِجيب له من عندنا ؟! ..

وأكيد إخوانا المسلمين اللي أعلنوا أول ناس الاحتفال أكيد محضرين نفسهم وجابوا ماسكات الحمل الوديع هتليق أكيد مع السلفيين اللي متنكرين على طول في الزي السعودي .. ومش هننسى السيدة لميس جابر بس تيجي لابسة عباية بكباسين بس تحتها هدوم علشان لمَّا نِهزَّر معاها ونسحلها على الأرض نشوف هيحصل معاها إيه ؟! وطبعاً توفي عوكشة بس ياترى هيلبس بطة ولا وِزة ولا حزمة جرجير ويجيب معاه أحمد سبايدر هيجي زي ماهو كده علشان هو سبايدر على طول ..

والداخلية بالأمن المركزي بتاعها اللي مِتْنَكَّرة على طول في زي البلطجية والبلطجية اللي مِتْنَكَّرين في زي الثوار والمجلس العسكري أحلى حاجة يجي لابس مدني مثلنا كده ويعمل اعتصام علشان لما إحنا نِتْنَكَّر ونلبس لبسه بالبيادات نعمل مع بعض ( شو ) زي اللي كان في الميادين والشوارع والاعتصامات .. وأفراد جيشنا العزيز يلبسوا فرو الذئاب علشان صورة نهش اللحم تبقى مظبوطة .. وأكيد هيبقى فيه  ألعاب نارية ، الرصاص المطاطي ده اللعبة اللي بيصفي العينين بس ومش بيعميها خالص والخرطوش والرصاص الحي اللي يعني يادوب بِيْمَوِّت مش بيقتل ولا حاجة .. والشعب الغلبان أكيد معزوم بس يِجُوا شايلين أنابيب الغاز الفاضية على أكتافهم علشان يِفَكَّرُونا إن نفس مشاكلنا مازالت موجودة ويِجِي معاهم الملثم مفجر أنبوب غاز إسرائيل  ويفضل ملثم كده علشان يبقى يفجر الأنبوب دايماً .. والثوار الحقيقيون يرفعوا لافتات إحنا حزب الكنبة وإحنا ميدان ومستشفى العباسية .. ويتفضلوا الأغلبية الصامتة بالحضور لابسين ملابس الشهداء اللي مليئة بدمائهم يِمكن ربنا ينعم عليهم بشوية دم وفهم إن دي ثورة بجد ولسه ما خلصتش .. وياريت مذيعي قنوات التليفزيون المصري يروحوا يقعدوا على كراسي يسري فودة وإبراهيم عيسى وريم ماجد وعبد الرحمن يوسف يمكن ينزل عليهم الوحي بتاعهم ويِبَلَّغهم إن دي ثورة مش انتفاضة .. 

وأهالي شهداءنا يتفضلوا شايلين صور أحبائهم اللي روحهم بتطوف حولنا متحسرة علينا وعلى دمائهم اللي هتروح هباء ...ويجي الفلول لابسين شياطين وأبناء مبارك راكبين حمير بالمقلوب وحملات عسكر كاذبون يمشوا يقولوا صادقون أمناء ورضي الله عنهم .. ويجي الماسونيون بالحظاظات وعين الماسونية على هدومهم .. وأكيد هنشغل أغاني مش بتاعة إزاي ترضي لي حبيبتي لمحمد منير لأ ( ليك الواوا بوس الواوا اللي هنهديها للشهداء واللي فقدوا عيونهم ـ وأخاصمك آه أسيبك لا اللي نهديها للمجلس العسكري ) .. واللي مش هيقدر يجيب لبس مخصوص كفاية يجي مِلَوِّن وشه بعلم مصر بس من غير اللون الأبيض والصقر في النُص لأن مصر هي كمان هتتنكَّر في الحفلة وتعمل نفسها السودان ..

الكوميديا السوداء إن الثورة أصبحت كارنفال ..أصبح فيها مشاهد لا يمكن أن تنسجم مع بعضها وليس بينها أي عوامل ربط أو عوامل مشتركة  يريدونا أن نحتفل بمولود خرج للحياة عليلاً مريضاً على شفا الموت .. يريدونا أن نحتفل ومازلنا نفقد العيون والأرواح والأخلاق دون أن يلقى الجناة الحساب .. عذراً لو أن طريقة عرضي هذه المرة لم ترقى أسلوبي المعهود وهذا لأني أصبت بصدمة عصبية عندما رأيت توفيق عكاشة على الشاشة من جديد مما قرر يوم 25 يناير إنه يحضر حفلة الثورة التنكرية يوم 13/13/2013 ..