ماما بِتْسَلِّمْ عليك وبتقولك : يالَّلا بَقى .. !!

https://www.facebook.com/note.php?note_id=10150696753471696
http://www.almogaz.com/opinion/news/2012/04/25/257786#.T5gRCOFBFVA.facebook

ماما بتسلم عليك وبتقولك : عندك مجلس شعب ؟!

ماما بتسلم عليك وبتقولك : عايزة ( لَمُونتين وشوية ملح ) وترفض بيان الحكومة مع " مامة النائب " اللي كانت موافقة على البيان وبعدين رفضته في الآخر ..

ماما بتسلم عليك وبتقولك : إنها بعد الحرايق اللي في السويس وطنطا وأسيوط ما سمعتش إن المتسبب هو اللهو والأصابع الخفية ولا الأطراف الخارجية وبتفكر مجلس الشعب إنه ما عملش لجنة علشان تكشف الفاعل زي اللجان اللي عملتها قبل كده ..

ماما بتسلم عليك وبتقولك : فيه نائب بيقول طول الطريق من بورسعيد لدمياط محفوف بالمخاطر ، يعني 90 كم2 رُعب (مربع  ياعالم مربع )..

ماما بتسلم عليك وبتقولك : إن نائب الإنجليزي مصمم ( يقطع خلفنا ) وبيكلم الدكتور أحمد زويل في أهمية اللغة الإنجليزية دا غير النائب اللي " اِتْفَزْلِك " وسأله عن الجايزة اللي بيقولوا إنه اتبرع بها لإسرائيل ..

ماما بتسلم عليك وبتقولك : خلي بالك م العيال علشان ما عادوش بيشوفوا MBC3  وبيتفرجوا معانا على مجلس الشعب  وهيبدأوا يتعلموا الشتايم م البيوت بدل الشارع ..

ماما بتسلم عليك وبتقولك : إن قانون العزل لم يخرج منه عمرو موسى وطنطاوي ، فاشتري 2م قماش زيادة علشان القماش " عَجِّز " مع ترزي الدستور ..

ماما بتسلم عليك وبتقولك : تعمل إيه لما تسمع أحمد شفيق بيقول إن استبعاده من سباق الرئاسة إعادة نظام مبارك زي بالظبط عمر سليمان لما قال إن قلبه كان مع الثورة وكان نفسه ينزل للميدان ؟! ..

ماما بتسلم عليك وبتقولك : إن هتبقى مصيبة لو أبو الفتوح " بَهَت " على الإخوان تاني وإن صباحي تصريحاته تِوَدِّي في داهية ..

ماما بتسلم عليك وبتقولك : اَصَرَّخ ولَّا أصوت في الانتخابات لما يصفصف الموضوع على الإستبن اللي عامل مؤتمراته الإنتخابية ( ناقص يجيب فيها تامر حسني) والفِل اللي بيقول إن فوز الإخوان يعيد الحزب الوطني ..
ماما بتسلم عليك وبتقولك : إن طول ما الناس بتسمع سعد الصغير وما بتستحملش تسمع سياسي " بيرغي " في حاجة مش فاهمينها عن البلد يبقى اللي هيفوز في الانتخابات شعار ( الإسلام هو الحل ) ..

ماما بتسلم عليك وبتقولك : ما اعرفناش زوجة عمر سليمان طلعت سورية ولَّا لأ..!

ماما بتسلم عليك وبتقولك : هو الجيزاوي محبوس علشان عاب في الذات الملكية ولا علشان معاه عشرات الآلاف من الأقراص المخدرة .. الظاهر كان شايل الشنط فيها برشام بس ؟! ..

ماما بتسلم عليك وبتقولك : هُمَّا أنصار أبو إسماعيل ما اتظاهروش ليه علشان الجيزاوي علشان لما بنقولهم إنكم بتنتفضوا بس علشان شخص أبو إسماعيل  بيزعلوا ..

ماما بتسلم عليك وبتقولك : عندك شوية جوزة الطيب مِ اللي حازم أبو إسماعيل قال عليها إنها حرام ؟! ..

ماما بتسلم عليك وبتقولك : فاكر جنسيتها ولَّا لأ .. ؟! ..
ماما بتسلم عليك وبتقولك : هو الدستور قبل الرئاسة ولا الرئاسة قبل الدستور ؟! ..
ماما بتسلم عليك وبتقولك : عندك دستور زيادة ؟! ..

ماما بتسلم عليك وبتقولك : إن هي بتتغاظ كل لما تشوف صورة الملك فاروق وهو قاعد وملوك وأمراء الخليج واقفين حَوَاليه وبِتِتْحَسِّر على الطرابيش اللي قلعناها علشان نلبس طراطير ..
ماما بتسلم عليك وبتقولك : إنها مش هتتطبخ في البيت شهر كامل بعد لما سمعت إن مستحقات الغاز اللي بيتصدر واقفة من 2008 ..

ماما بتسلم عليك وبتقولك : إسرائيل بتقول علينا منظمة إرهابية وبتفكَرَّك إن الناس زمان أيام العدوان الثلاثي كانت بِتِطْلع على العدو اللي بينزل بالبارشوتات بإيدين " الهُون " وغُطيان " الحِلل "، علشان كده بتقولك ( خلي السلاح صاحي ) ..

ماما بتسلم عليك وبتقولك : إن بيرتفع عندها الضغط والسكر كل لما تشوف صورة طنطاوي بيسلم على مبارك وإن مبارك أقصى حاجة هتحصله إنه يفضل نايم على سرير ..
ماما بتسلم عليك وبتقولك : اتصل بأسبانيا اسألها على حسين سالم علشان كانت قايلة إنها هتسلِّمه لمصر ولسه ما جاش للوقت !! ..

ماما بتسلم عليك وبتقولك : إنها مش متفائلة أبداً إن  " العُكش " بتاع البط هياخد حُكم في يوم من الأيام  بعد لما حمدي بدين اعتذرله شخصياً على الهوا ..

ماما بتسلم عليك وبتقولك : إن حملة عسكر كاذبون وإخوان منافقون ما عملتش حاجه وإن الشعب لسه وهيفضل " نَسَّاي " ..

ماما بتسلم عليك وبتقولك : إن الشعب لسه قالع الجزم من ساعة ما قلعها ورفعها في وش النظام في الميدان ..
ماما بتسلم عليك وبتقولك : إنها ماعادتش عاملة نفسها نايمة وإن اللي اختشوا ماتوا وإن إحنا مش هنرضى بالمُر ولا باللي أَمَّر منه ..
ماما بتسلم عليك وبتقولك : إنها لم تكن تنتوي الشكوى ولكنها تريد الخير لمصر وسنعيش كراماً ( كِده وكده ) ..

ماما بتسلم عليك وبتقولك : كفاية بقى نزول الميدان كل جمعة لأنها بقت عاملة زي الكرنفالات ..

ماما بتسلم عليك وبتقولك : إن الشعار الجديد للثورة ( مفيش ، وهمية ، فضائية مصرية ) ..

ماما بتسلم عليك وبتقولك : عندك هُولز ؟! ..

ماما بتسلم عليك وبتقولك : قُول للبرادعي ياللَّا بقى ..